Rev 7 | AOM | STEP | Ëhi'amu gavodeje anerae 4 riravamu. Sa'ae aho'o dinö'e dinö'e jiajoho ririre jio'i jabumë aruhiae anumiae aruae aviae riravo rova'ohijo. Riravo rova'oromo anerae gemuëro gemuëro burehu rovajoho gemu gemu tugohohijo buroho bogo rueromo sa'aho jovoho ijoho huosihoröhego.

Revelation of John 7

God-hu hesi aribövie 144,000 avoho muebejëvade jöhoje.

1 Ëhi'amu gavodeje anerae 4 riravamu. Sa'ae aho'o dinö'e dinö'e jiajoho ririre jio'i jabumë aruhiae anumiae aruae aviae riravo rova'ohijo. Riravo rova'oromo anerae gemuëro gemuëro burehu rovajoho gemu gemu tugohohijo buroho bogo rueromo sa'aho jovoho ijoho huosihoröhego. 2 Buroho ëhi tugohamu gagorovo na gavodeje anerae göëro aruhe maja rojomajire jioromo rojomamu. Rojomoromo God darugo'ehu hijaje hesi jajivarue inömoho hesi övëro baejë'e ruehijo ëhuro God-are aribövi jabesi sinore taemëhego jaji'e jio'amo'iröhego. Rueromo ma-darugo'o uvohijo rue anerae 4-ho jaburo hejöro mami'e sa'a'o sö jovo'o ijumo'iröhe vöröho God-aro baeruomë'ëro. 3 Uvoromo uvohijo: Jemëro sa'aho jovoho ijoho nadi vejö'oho ijumo'amohëjo. Hujeji God-are mu vaejarue aribövi jabesi varijore God-are soroho jajivëhego evare jemëro ë jajoho garomo uvo'irarijego: God-ro tugohë'e höromo jemëro jabumë bogo ijumëvo'i öri ari'ohemu ijumo'irarije höjo. 4 Ëhi uvavamu hejë'i hejodeje aëro uevamu: God-are soru varijore baejare aho 144,000 ëmino'e höjo. Israel hesi agane 12 aho'obëhe baebe va'ë'e höjo. 5 Judah'o hesi ujoho 12,000. Reuben hesiroho 12,000. Gad hesiroho 12,000. 6 Asher hesiroho 12,000. Naphtali hesiroho 12,000. Manasseh hesiroho 12,000. 7 Simeon hesiroho 12,000. Levi hesiroho 12,000. Issachar hesiroho 12,000. 8 Zebulun hesiroho 12,000. Joseph hesiroho 12,000. Benjamin hesiroho 12,000. Ëaribövioho 144,000 jaburo God-are soroho baeruomade höjo.

God-are aribövie ae aho'obëhe riravoruomade jöhoje.

9 Ëhi'amu naro ga'i gavodeje ae aho'obëhe mae riravamu. Bogo adaho varijënoho jiohijo. Sa'ae dinö'e dinö'e agane gö gö sine gö gö huë gö gö aribövioho ajivë'e niögu ëgoho io'amë'e juva hanoho ujuohë'e God-are röho ma hesi nuninö Sheep Harihu hesi nuninö riravohijo. 10 Riravoromo ma-darugo'o uvoruomohijo: God röho mare hiromo muebejavuajohu'o Sheep Harihohu'o jaburo niö'iro mabëhe ajamuiromo manö babamavuë'e höjo. 11 Ëhi uvoruomamu God-are röho maho riri mare jio'i God rajahijarue maje 4-ho ruë numë riravo rova'i röhu majo jabesi dejonö a duvahoho ruë numë raromo rova'i röhu a duvaho jabesi dejonö ë aneraho aho'obëhe ruë numë riravo rova'ohijo. Ëhi riravoromo röho ma hesi riröre ague aho raromoromo God rajahiruomohijo. 12 Rajahiromo uvoruomohijo: Aveho iae mae-ëjo. Aji maho uehoro maho iho maho darugo maho vörö maho nosi Böröme God-aremu jiajoho ëhi ma-jiemu jiobe va'a'ajëjo. Ma-jiemu jiobe va'ië'ego noro hu gemu rajahiromo huë mabëhe uanövo'ejarëjo. Iae mae-ëjo.

13 A duvahe 24-ho röhu gemuëro ri'öromo na uehijo: Ëajivë'e niögu ëgo io'amë'e aribövioho rahumë jioruomajëjo. Dinö'e jioromo rueruomade höjo. 14 Rueruomade höjamu naro uavodeje: Na bogo gavajëjo. Jasi jero gavanuëjo. Jasi jero gavanuë'ego rue a duvahohuro uehijo: Ëajivë'e niögu io'amë'e aribövioho ëho bogo vuovëvë'e sa'are raromamu evare Iesu bijönimarue ariböviohuro jabesi örire huë vavaene börömo bëhe bojëmamu baeruomade höjo. Baeromo röhu iae mae rueruomade höjo. Jabumëro God-are Sheep Harihu hesi köhuro jabesi niögoho u'oruomamu jabesi sisëho barëjëhë'ëro niögoho ma-ajemu jiëho'amajëjo. 15 Ëhu'ëro jië'ëro jabumë God-hu hijaje röho ma ë hesi nuninö riravoromo hesi osare vahie majae ma-hesi muohemu vaemu vaejahoruomaje höjo. Vaejaho'iramu röho mare hijaje ahuro jabu'o gemu mae hiromo mu sisëho raboho tugohëho'iramu munë bururo raromanovoruomo'ajëjo. 16 Munë bururo raromanovoruomo'iramu ijonöho vadunoho bogo hömëvonövo'ajëjo. Huëho bogo girihëvonövo'ajëjo. Majaho bövioho bise'oho bogo ravëvo'iramu sinoroho vörö'iraeromo birebirëgonövo'ajëjo. 17 Rabëni hesi bëhoho God-are Sheep Harihe röho ma hesi ririre hijaje ahuro ë aribövioho hesi Sheep ömo'ömego gagovëvoromo muebejëvonövo'ajëjo. Muebejëvoromo sö ujuohoromo a i'ovëvo'iröhe jovore ë va'onövo'ajëjo. Ëhi'o'iramu God-ro jabesi nuni jovoho miorëho'iramu jabesi huë vavaenoho aho'obëhe barë'ajëjo.